اسلام آباد۔22اگست(اے پی پی)صدر مملکت آصف علی زرداری آئین دے آرٹیکل 160 دے تحت 11ویں قومی مالیاتی کمیشن دی تشکیل دا نوٹیفکیشن جاری کر ݙتے۔ وزیر خزانہ دے مشیر خرم شہزاد سماجی رابطے دی ویب سائٹ ایکس تے جاری پوسٹ اچ آکھیے جو صدر مملکت آئین دے آرٹیکل 160 دے تحت 11ویں قومی مالیاتی کمیشن دی تشکیل دا نوٹیفکیشن جاری کر ݙتے۔ انہاں آپݨی پوسٹ دے نال نوٹیفکیشن دی کاپی وی لائی اے۔ وزیر خزانہ کمیشن دی قیادت کریسن، کمیشن اچ صوبائی وزرائے خزانہ، نامزد ماہرین شامل ہوسن۔ کمیشن محصولات و گرانٹس دی ون٘ڈ، قرضہ گھنݨ دے اختیارات اتے قومی منصوبیاں اچ اخراجات دی حصہ داری دے حوالے نال سفارشاں بݨیسی۔ نوٹیفکیشن دے مطابق وفاقی وزیر خزانہ این ایف سی دے چیئرمین ہوسن۔ وزیر خزانہ پنجاب، وزیر خزانہ خیبرپختونخوا، وزیر خزانہ سندھ، وزیر خزانہ بلوچستان، ناصر محمود کھوسہ (پنجاب)، ڈاکٹر اسد سعید (حکومت سندھ)، ڈاکٹر محمد رسول (حکومت خیبرپختونخوا) اتے فرمان اللہ (حکومت بلوچستان) کمیشن دے اراکین ہوسن۔ نوٹیفکیشن دے مطابق آئین دی دفعہ 160 دی شق (2) دے تحت صدر پاکستان کوں سفارشاں پیش کرݨ کیتے گیارہویں قومی مالیاتی کمیشن دیاں شرطاں وی جاری کیتاں ڳئن جنہاں اچ آئین دی دفعہ 160 دی شق (3) اچ بیان کیتے ڳئے وفاق اتے صوبیاں وچال ٹیکساں دی خالص آمدنی دی ون٘ڈ، وفاقی حکومت ولوں صوبائی حکومتاں کوں گرانٹس ان ایڈ ݙیوݨ دا طریقہ، وفاقی اتے صوبائی حکومتاں دے قرضہ گھنݨ دے آئینی اختیارات دے استعمال دے امور، او معاملات جیڑھے مالی اخراجات دی ون٘ڈ بارے ہین، ڄیڑھے وفاق صوبیاں دے دائرہ کار اچ آوݨ آلے مضامین یا امور کیتے ہن یا کرݨن، او معاملات جیڑھے مالی اخراجات دی ونڈ بارے ہین، جیڑھے وفاق، صوبیاں یا ݙوہاں بین الصوبائی نوعیت دے امور کیتے ہین یا کرݨن، قومی منصوبیاں دے مالی اخراجات دے امور، ڄیکوں وفاق اتے صوبیاں وچال سانجھے طور تے ونڈیا ونڄݨے اتے کوئی وی ݙوجھا مالیاتی معاملہ جیڑھا صدرِ پاکستان ولوں کمیشن کوں بھیڄیا ونڄے، شامل ہن۔ نوٹیفکیشن دے مطابق فنانس ڈویژن، رولز آف بزنس 1973 دے تحت کمیشن کوں سیکرٹریٹ معاونت ݙیسی۔
