اسلام آباد۔ 18 ستمبر(اے پی پی) قائم مقام صدر سید یوسف رضا گیلانی آکھیے جو پاکستان، کشمیری عوام دی اقوام متحدہ دی سلامتی کونسل دی قرارداداں تے کشمیری عوام دی خواہشات موجب انہاں دے جائز حق خود ارادیت گھنݨ تئیں، بھرپور سیاسی، سفارتی تے اخلاقی حمایت جاری رکھیسے۔ ایوان صدر دے پریس ونگ توں جاری بیان موجب اے ڳالھ انہاں ایوانِ صدر وچ آزاد جموں و کشمیر (اے جے کے) دے وفد نال ملاقات اچ ڳالھ مُہاڑ کریندے آکھی۔ وفد وچ آزاد کشمیر قانون ساز اسمبلی دے اسپیکر چوہدری لطیف اکبر، سابق وزیراعظم آزاد کشمیر راجہ محمد فاروق حیدر خان تے رکن قانون ساز اسمبلی حامد رضا شامل ہن۔ قائم مقام صدر آکھیے جو کشمیر انہاں دے دل دے ٻہوں نیڑے ہے۔ وزیراعظم دے اپݨے دور دا حوالہ ݙیندے انہاں انہاں اقدامات دا ذکر کیتا جیڑھے انہاں دی حکومت آزاد جموں و کشمیر دے عوام دے معیار زندگی کوں بہتر بݨاوݨ کیتے چاتن، جیندے وچ جامعات، میڈیکل کالجاں کیتے فنڈنگ تے بہتر سڑکاں دے انفراسٹرکچر شامل ہن۔ وفد جنوبی پنجاب وچ اڄوکی چھل دے ضیان تے تشویش کیتی ۔ اجلاس وچ گزریل ݙینھ انتقال کر ڳئے حریت کانفرنس دے چیئرمین تے کشمیری رہنما عبدالغنی بٹ دی خدمات دی تعریف کیتی ڳئی ۔ سید یوسف رضا گیلانی آکھیے جو کشمیر دی تحریک کیتے عبدالغنی بٹ دی زندگی بھر دی جدوجہد کوں ہمیشہ احترام نال یاد رکھیا ویسی۔ انہاں مرحوم عبدالغنی بٹ کوں خراج تحسین پیش کریندے آکھیے جو انہاں دی قربانیاں آوݨ آلیں نسلاں کیتے مشعل راہ ہن۔ قائم مقام صدر آزاد کشمیر قانون ساز اسمبلی دے اسپیکر کوں نومبر وچ تھیوݨ آلی بین الاقوامی اسپیکرز کانفرنس وچ شرکت دی دعوت ݙتی۔ انہاں بھارتی غیر قانونی مقبوضہ جموں و کشمیر وچ بھارت دی طرفوں چاتے ونڄݨ آلے ظلم ، آسیہ اندرابی، یاسین مالک تے شبیر شاہ جیہاں نامور رہنماواں نال ناروا سلوک دی مذمت کیتی۔ انہاں واضح کیتا جو پاکستان بین الاقوامی فورمز تے کشمیر دے جھیڑے کوں زور و شور نال چیندا رہسی ۔ سید یوسف رضا گیلانی آکھیے جو مئی 2025 وچ بھارت نال معرکہ حق دے دوران، پاکستان دی سول تے فوجی قیادت ہک ایٹمی ریاست ہووݨ دے باوجود ذمہ دارانہ رویہ اختیار کیتا، حالانکہ بھارت دی طرفوں اشتعال انگیزی تے بے بنیاد الزامات لاتے ڳئن ۔ انہاں ݙسایا جو پاکستان بھارت توں غیر جانبدارانہ تحقیقات کراوݨ تے اتفاق کرݨ دی درخواست کیتی ہئی، جیڑھی مسترد کر ݙتی ڳئی۔ بھارت یکطرفہ طور تے سندھ طاس معاہدہ وی معطل کر ݙتا۔ اگرچہ پاکستان جواب ݙیوݨ دا حق محفوظ رکھیا، لیکن اوں پورے عرصے وچ تحمل دا مظاہرہ کیتا۔ انہاں آکھیے جو پاکستان دی پوزیشن کوں بین الاقوامی سطح تے حق بجانب ثابت کیتا ڳیا، کیوں جو اے سچائی تے مبنی ہئی جݙاں جو بھارت دے بیانیے کوں عالمی سطح تے مسترد کر ݙتا ڳیا۔ قائم مقام صدر ایں ڳالھ دی تجدید کیتی جو جنوبی ایشیا وچ پائیدار امن تے استحکام کیتے جموں و کشمیر جھیڑے دا حل ٻہوں ضروری اے۔
.jpg)