اسلام آباد۔12ستمبر (اے پی پی) پاکستان بھارت دے غیر قانونی طور اُتے زیر تسلط جموں و کشمیر اچ انسانی حقوق دیاں سنگین پامالیاں اُتے تشویش دا اظہار کریندے آکھیے جو مقبوضہ علاقے اچ لوکاں کوں بھارتی حکام دے مختلف ظالم اقدامات دا سامݨا کرݨا پوندا پئے۔ ترجمان دفتر خارجہ شفقت علی خان اتھاں پریس بریفنگ اچ آکھیا جو ممتاز کشمیری رہنما شبیر احمد شاہ جنہاں دی گزریل ویلھے اچ کینسر دی تشخیص تھئی اے، کوں ضمانت ݙیوݨ توں ہک واری ول انکار کر ݙتا ڳئے۔ ترجمان آکھیا جو ݙو ہفتے پہلے قابض حکام من مرضی نال فلاح عام ٹرسٹ دے تلے چلݨ آلے 215 نجی سکولاں کوں آپݨے قبضے اچ گھنݨ دا فیصلہ کیتا۔ انہاں آکھیا جو اے زبردستی آلے اقدامات بھارتی حکام دے سنگین طرز عمل کوں واضح طور اُتے ݙیکھیندے پئن۔ ترجمان بھارتی حکام اُتے زور ݙتا جو او کشمیری عوام دے بنیادی حقوق اتے آزادیاں دا احترام کرن اتے انہاں کوں انہاں دا ناقابل تنسیخ حق خود ارادیت ݙیون جیں دا وعدہ اقوام متحدہ دی سلامتی کونسل دیاں متعلقہ قرارداداں اچ کیتا ڳئے۔ انہاں ایں ڳالھ اُتے وی زور ݙتا جو شبیر احمد شاہ اتے ٻئے ہزاراں کشمیری سیاسی قیدیاں کوں وی رہا کیتا ونڄے۔
.jpg)
