اسلام آباد۔3 اکتوبر(اے پی پی) اسلام آباد ہائی کورٹ اے پی پی میگا کرپشن کیس وچ سابق ایگزیکٹو ڈائریکٹر عدنان اکرم باجوہ تے شریک ملزم شاہد لطیف دی عبوری ضمانتاں خارج کرݙتن۔ عدالت دے فیصلے دے بعد ایف آئی اے اہلکاراں ڈوہائیں ملزمان کوں احاطہ عدالت توں گرفتار کرڳھدا۔ اسلام آباد ہائی کورٹ دے جسٹس محمد اعظم خان کیس دی سماعت کیتی۔ سماعت دے دوران اے پی پی دے لیگل ایڈوائزر رانا روحیل تے خرم بیگ ایڈووکیٹ عدالت وچ پیش تھئے تے ملزمان دے کردار تے روشنی پاتی۔ رانا روحیل عدالت کوں ݙسیا جو عدنان اکرم باجوہ غیر قانونی طور تے پراویڈنٹ فنڈ دی منتقلی دی اجازت ݙتی جیندے بعد شریک ملزمان نے ملازمین کیتے مختص کروڑاں روپے جیڑھے دراصل ملازمین دی امانت ہن، غیر قانونی طور تے ݙوجھے اکاؤنٹس وچ منتقل کیتے۔ ایں دوران اے پی پی دے وکیل خرم بیگ ایڈووکیٹ موقف اختیار کیتا جو ملزم شاہد لطیف نقلی سیلری شیٹس تے کریڈٹ شیٹس تیار کریندا ریہا جنہاں دی بنیاد تے کروڑاں روپے دیاں غیر قانونی تنخواہیں بݨائیاں ڳئیاں تے قومی خزانے کوں بارا ضیان پُڄائے۔ عدالت فریقین دے دلائل سݨݨ دے بعد ڈوہائیں ملزمان دی طرفوں دائر عبوری ضمانت دیاں درخواستاں خارج کر ݙتن۔ فیصلے دے بعد ایف آئی اے ٹیم ملزمان کوں عدالت دے احاطے توں گرفتار کر ڳھدا۔ یاد رہے جو ایف آئی اے ایں کیس وچ مجموعی طور تے 16 ملزمان دے خلاف کارروائی شروع کر رکھی اے جنہاں تے ملازمین دے فنڈز تے قومی خزانے دے کروڑاں روپے دی خوردبرد دے الزامات ہن
