لندن۔ 28 ستمبر(اے پی پی) وزیراعظم محمد شہباز شریف آکھیے جو پاکستان معیشت، خارجہ تعلقات تے دفاع سمیت ہر محاذ تے تکھے ترقی کریندا پئے۔ معاشی استحکام حاصل کر ڳھدا ڳئے، ہݨ ملک معاشی ترقی دی طرف ٹُر پئے۔ لندن وچ پاکستانی ہائی کمیشن دے دورے دے دوران ٻاہرلے ملک رہݨ آلے پاکستانیاں دے وفد نال ڳالھ کریندے انہاں آکھیا جو ماضی وچ پاکستان دی معیشت ہک اوکھے دور توں گزری، موجودہ حکومت دیاں کامیابیاں خلوص، محنت تے ٹیم ورک دا نتیجہ ہن تے ہر ہک مقصد حاصل کرݨ وچ آپݨا کردار ادا کیتا۔ وزیراعظم آکھیا جو اساں تعاون، مشاورت، خلوص، مسلسل کوششاں تے فکر و عمل دے اتحاد نال ہر اوکھ تے قابو پاسڳدوں تے ترقی کر سڳدوں ۔ پاکستان قوماں دی برادری وچ وقار تے احترام حاصل کیتے۔ انہاں یاد ݙیوایا جو پاکستان جنگ جتی تے آپݨے دشمن کوں ہرا ݙتا، جیندے بعد دنیا وچ پاکستان دا وقار بلند تھیا۔ انہاں آکھیا جو اقوام متحدہ دی جنرل اسمبلی وچ آپݨی تقریر وچ انہاں پاکستانی عوام دی نمائندگی کیتی، انہاں دا مقدمہ پیش کیتا تے انہاں دے جذبات دی عکاسی کیتی۔ انہاں ݙسایا جو آپݨی تقریر وچ انہاں کشمیر تے فلسطین دے مسئلیں کوں اڳوں رکھیا۔ انہاں آکھیا جو مقبوضہ جموں تے کشمیر دے عوام ہک ݙینھ آپݨی آزادی دی منزل تک پُڄسن۔ وزیراعظم آکھیا جو غزہ دے لوک جیڑھے ظلم تے بربریت دا سامݨا کریندے پئن، اوندی دنیا وچ کوئی مثال کائنی۔ امریکی صدر ڈونلڈ ٹرمپ دی سربراہی وچ عرب، اسلامی ملکاں نال مشاورت غزہ دے معاملے تے حوصلہ افزا نتائج پیدا کریسی۔ انہاں آکھیا جو غزہ وچ قابض فوج عورتاں، ٻالاں، نوجواناں تے بزرگاں سودھے 64000 مسلماناں کوں شہید کیتے۔ انہاں غزہ وچ امن تے ظلم دے خاتمے کیتے دعا کیتی۔ وزیراعظم آکھیا جو انہاں دی واشنگٹن وچ صدر ٹرمپ نال تعمیری تے کارآمد ملاقات دوستانہ ماحول وچ تھئی۔ انہاں زور ݙے تے آکھیا جو اے ملاقات امریکہ نال بہتر تعلقات دا سنگ میل ثابت تھیسی۔ انہاں آکھیا جو ٻاہرلے ملک مقیم پاکستانی اساݙے قیمتی اثاثے ہن، او پاکستان دے عظیم سفیر ہن تے اوہ آپݨے ملک دی جانفشانی نال خدمت کریندے پئن۔ایں موقع تے نائب وزیراعظم تے وزیر خارجہ سینیٹر محمد اسحاق ڈار آکھیا جو اقوام متحدہ دی جنرل اسمبلی دے اجلاس دے دوران وزیراعظم پاکستان دی مؤثر طریقے نال نمائندگی کیتی۔ انہاں آکھیا جو پنج عرب ملک (سعودی عرب، متحدہ عرب امارات، قطر، اردن تے مصر) تے ترائے غیر عرب مسلم ملک (پاکستان، ترکیہ تے انڈونیشیا) سودھے اٹھ ملکاں دے سربراہواں امریکی صدر نال ملاقات کیتی تے غزہ دے مسئلے تے ڳالھ مہاڑ کیتی۔ انہاں آکھیا جو پہلی ملاقات دے بعد وی ملاقاتاں جاری رہیاں تے اے غزہ دے معاملے تے مثبت نتیجہ ݙیسی، جیڑھے قوم نال شیئر کیتے ویسن۔ اسحاق ڈار آکھیا جو پاکستانی قیادت اقوام متحدہ دی جنرل اسمبلی دے اجلاس دے دوران تقریباً ݙو درجن ملاقاتاں وچ ہر فورم تے قوم دی نمائندگی کیتی۔ پاکستانی وفد کشمیر، فلسطین تے غزہ دے مسئلے بین الاقوامی برادری دے سامݨے چاتے۔ انہاں آکھیا جو جݙݨ وزیراعظم اپریل 2022 وچ ذمہ داری سَنبھالی تاں انہاں پاکستان کوں معاشی ڈیفالٹ کنوں بچایا۔ انہاں آکھیا جو نواز شریف پاکستان دی معیشت کوں 24ویں وݙی معیشت بݨایا ہئی، جیڑھی اڳلے چار سالاں دی بدانتظامی پاروں بعد وچ 47ویں نمبر تے آ ڳئی۔ انہاں آکھیا جو ہݨ حالات بہتر تھی ڳئن، معاشی استحکام حاصل تھی ڳئے، سود دی شرح 22 فیصد توں گھٹ تھی تے 11 فیصد رہ ڳئی اے تے مہانگ 30 فیصد توں گھٹ تھی تے 5 فیصد رہ ڳئی اے۔ انہاں آکھیا جیویں جیویں پاکستان ترقی کریسی، اوں نال غربت ختم تھیسی، ترقی تھیسی تے عوام دی فی کس آمدݨی وچ ودھارا تھیسی۔ انہاں آکھیا جو حکومت پاکستان کوں اڳوں تے گھن ونڄݨ دی کوشش کریندی پئی اے، پاکستان دی ترقی نظر آندی پئی اے تے دنیا اوں کوں منیندی پئی اے۔
.jpg)
.jpg)
