اسلام آباد۔7جولائی(اے پی پی)وزیراعظم دی اڳواݨی اچ انرجی ٹاسک فورس دا اجلاس تھئے جیندے اچ فیصلہ کیتا گئے جو قومی سولر انرجی پالیسی دا اعلان یکم اگست کوں کر ݙتا ویسی، پالیسی دا نفاذ مشترکہ مفادات کونسل دی منظوری نال مشروط ہوسی، وزیرِاعظم ہاؤس اتے وزیرِاعظم آفس کوں ہک مہینے اچ شمسی توانائی تے منتقل کر ݙتا ویسی۔ اجلاس نال الیندے وزیراعظم شہباز شریف آکھیے جو لوکاں کوں سستی اتے ماحول دوست بجلی ݙیوݨ ترجیھ اے، شمسی توانائی نال ڈسٹری بیوشن لاسز، بجلی دی چوری اتے گردشی قرضے دے مسئلے حل تھیسن، کوشش اے جو ملک کوں توانائی دے شعبے اچ پیریں تے کھڑا کیتا ونڄے۔ اجلاس اچ وفاقی وزیر توانائی انجینئر خرم دستگیر، وفاقی وزیر خزانہ مفتاح اسماعیل، وفاقی وزیر منصوبہ بندی احسن اقبال، وفاقی وزیر اطلاعات و نشریات مریم اورنگزیب، وزیر مملکت پٹرولیم مصدق ملک اتے متعلقہ اعلیٰ افسران موجود ہن۔
