اسلام آباد۔7نومبر(اے پی پی) وفاقی وزیرخزانہ و محصولات سینیٹر محمد اور نگزیب آکھیے پاکستان تےجاپان وچال نیڑے دوستانہ تعلقات ہن ݙوہیں ملکاں وچال تجارت، ثقافت، تعلیم اتے عوامی رابطے دے ذریعے آپݨے تعلقات کوں مزید تکڑا بݨاوݨ دے وسیع موقع تےاستعداد موجود اے۔ انہاں اے ڳالھ اتھاں جاپان دے سبکدوش تھیوݨ آلے سفیر متسوہیرا وادا کوں ملاقات اچ آکھی ،ملاقات اچ ݙوہیں ملکاں وچال پراݨے ݙو پاسے تعاون، علاقائی تے عالمی امور تے مشترکہ اقدار ونقطہ نظر تے ڳالھ مہاڑ تھئی ۔سبکدوش تھیوݨ آلے سفیر متسوہیرا وادا، جنہاں پاکستان اچ آپݨی ترائے سالہ مدت پوری کرڳھدی اے ، انھاں پاکستان تے جاپان وچال 1952 اچ بݨݨ آلے سفارتی تعلقات دے بعد اقتصادی اتے سفارتی تعلقات اچ مستحکم پیشرفت تے روشنی پاتی۔ انھاں ݙو پاسے تعلقات اچ مثبت رجحانات دا حوالہ ݙتا تے آکھیے جاپان تجارت اتے کاروبار ودھاوݨ ، ثقافت ، کھیݙاں، نینگراں تے تعلیمی تبادلیں اچ ودھارے دے ذریعے پاکستان نال تعاون اچ پرعزم اے انہاں صحت، تعلیم، ماحولیات، پاݨی اتے طرز حکمرانی جیھے سانجھے ترجیحی شعبیں اچ جاپان دے پاکستان دی حمایت دے عزم دا اعادہ کیتے ۔ وزیرخزانہ پاکستان تے جاپان وچال پراݨے ݙو پاسے تعاون دی تعریف کیتی تے پاکستان سانڳے جاپان دی ترقیاتی تے اقتصادی امداد دی اہمیت تے روشنی پاتی ۔ وزیرخزانہ پاکستانی معیشت کوں پیش چیلنج نال نبݨݨ تے اینکوں تکڑا بݨاوݨ اچ جاپان دے کلیدی کردار دی تعریف کیتی تے آکھیے ݙوہیں ملکاں وچال تجارت، ثقافت، تعلیم اتے عوامی رابطے دے ودھاوݨ دے ذریعے تعلقات تکڑے کرݨ دے وݙے موقع تے جاہ موجود اے ۔ وزیر خزانہ جاپانی سفیر کوں ملکی معیشت دی صورتحال اتے مختلف معاشی اشاریں اچ چنڳی بہتری دا ݙسائے، حکومت اپݨے اصلاحاتی ایجنڈے کوں اڳوں ودھاوݨ دے عزم تے قائم اے۔ انھاں آکھیے پائیداراقتصادی ترقی سانڳے اقدامات دے نتیجے اچ معیشت مستحکم تھی ڳئی اے۔
